Mam miˇ qhahˬ-ahˇ jawˇ uˇ le-euˬ tsawˇ haˬ aˇ muˇ deuˬ laꞈ qhoeˇ Tiˇbehˆ-Mam aˇ muˇ pyeuꞈ-eu
(1) Khamˇ
(2) Mam hawˇ-eu aˇ hu Mam aˇ jeuˬ aˇ cha
(3) Loˬloˬ aˇ muˇ heu deuˬ-aˬ, gaˇ ma (3) khahˇ-ahˇ neh Mam miˇ qhahˬ-ahˇ oe uˇ-euˬ meh.
Aˬkhaˬ tsawˇ jeuˬ deuˬ-aˬ, Loˬloˬ aˇ muˇ pyeuꞈ-awˇ Naˬkhaw lawˇ baˬ(မဲခေါင်မြစ်) laꞈ oˆ phaw mˇ dzaˬ qawꞈ dawˇ-eu miˇ tsaˬ miˇ muiˬ-ahˇ poˆ poˆ-ehˇ oe kha leꞈ ngeh, Laꞈbuiˬ miˇ qhahˬ nahˇ ma ga qhehˬ phaw jaˆ-eu Yuˬnaˬ miˇ tsaˬ-ahˇ jawˇ le-euˬ meh. Qhoeˇ gaˇ neh htiˬ tiˆ Mam miˇ qhahˬ-ahˇ uˇ le-euˬ meh. Aˇ hu Aˬkhaˬ aˬ phoeˬ aˬ bawˇ deuˬ ehˇ-eu-aˬ, Aˬkhaˬ tsawˇ jeuˬ deuˬ qawꞈ, Ja deh lehˇ khuˇ-eu jawˇ duˬ-ahˇ Aˬkhaˬ sahˬ phaˬ baw-awˇ jawˇ yaꞈ-euˬ meh. Ehˇ qawꞈ, gaˇ dahˬ gaˇ dzeˇ jawˇ-eu deuˬ guiˇ deuˆ laˇ-awˇ meuˬ byaˆ-iˇ-euˬ meh. Qhoeˇ naˇ, Aˬkhaˬ zaˬ deuˬ laꞈ oˆ phaw Siˇsaw paˆnaˇ phaw oe kha-euˬ meh.
Siˇsaw paˆnaˇ-ahˇ neh htiˬ tiˆ aˬ bawˇ Khah soˆ jawˇ baˇ, aˬ yawꞈ-euˬ miˬ sawˇ yo zaˬ hawˇ-eu aˬ yuiꞈ aˬ nyiˇ deuˬ sheuˬ-awˇ Laꞈbuiˬ-Mam miˇ khaˬ pyeuꞈ-eu Naˬla lawˇ gawˆ-ahˇ tcehˆ-awˇ Mam miˇ qhahˬ-ahˇ uˇ le-euˬ meh. Aˬ yawꞈ Mam miˇ qhahˬ-ahˇ uˇ le ghaˬ ngeh, aˬ yawꞈ-euˬ mehˬ nah ghawˬ mya ni phaˇ chaw hteh le-euˬ meh. Naˬla hawˇ-eu Naˬlo lawˇ baˬ yaw khaˬ-ahˇ jaˆ-eu Meuˬyaˬ, Meuˬma hawˇ-eu Law miˇ gawˬ jawˬ-ahˇ 100 qoꞈ ehˇ ghaˬ ni htiˬ gaˇ saˇ-iˬ htiˬ gaˇ jawˇ yaꞈ-euˬ meh.
Aˬkhaˬ tsawˇ jeuˬ deuˬ-aˬ, Naˬkhmˇ lawˇ baˬ (သံလွင်မြစ်) nahˇ ma doˆ qhehˬ phaw Naˬlo hawˇ-eu Na laˬ lawˇ baˬ yaw khaˬ-ahˇ htiˬ gaˇ saˇ-iˬ htiˬ gaˇ jawˇ yaꞈ-euˬ meh. Aˬkhaˬ zaˬ deuˬ-aˬ Naˬlo lawˇ baˬ-ahˇ tcehˆ-awˇ Jeˬdmˇ-Toˆtaˆ phaw maˬ ehˇ, Jeˬdmˇ meuˬ laꞈ taˆ phaw maˬ ehˇ, Meuˬngawˬ, Meuˬgaˆ phaw maˬ ehˇ, Meuˬyawˬ phaw maˬ ehˇ oe-awˇ jawˇ-euˬ meh. Qhoeˇ uˬ taꞈ htiˬ paˆ na deuˬ-aˬ Ta chiˬleˇ phaw jawˇ-iˇ-euˬ meh. Jeˬdmˇ hawˇ-eu Ta chiˬleˇ-ahˇ jawˇ-eu Aˬkhaˬ zaˬ htiˬ paˆ na-aˬ Htaiˬ miˇ qhahˬ-ahˇ phawˇ-iˇ-euˬ meh.
Aˬkhaˬ tsawˇ jeuˬ deuˬ-aˬ, Biˬchmˬ miˇ qhahˬ nahˇ ma doˆ qhehˬ Jeˬdmˇ deh ga hawˇ-eu Jeˬdmˇ dawˬ pheh jaˆ-eu gawˬ jawˬ deuˬ-ahˇ jawˇ-eu myaˬ dzehˬ meh. Iˬ nah-aˬ, Aˬkhaˬ tsawˇ jeuˬ deuˬ Mam miˇ qhahˬ, Htaiˬ miˇ qhahˬ, Biˬyehˆnaˬ miˇ qhahˬ, Laoˇ miˇ qhahˬ hawˇ-eu Laꞈbuiˬ miˇ qhahˬ deuˬ-ahˇ jawˇ luꞈ gaˇ ya mawˇ-eu meh.
